嚟到10月尾，秋去冬來，歐洲提早出現嚴寒天氣，德國、法國同埋英國部份地方仲落埋雪㖭。前日嘅英超雖則唔見有雪落，但氣溫明顯驟降，令到球員容易受傷；其中喺曼城主場贏史雲斯1:0場夜波，主隊後衞米卡李察士同客軍門將禾姆就雙雙中招被抬離場，球證艾堅遜亦破紀錄補咗12分鐘42秒，令呢場波足足打足102分鐘42秒。寒流開始侵襲歐洲，前晚弗賴堡主場負多蒙特0:2場德甲就喺大雪下進行，索察迎伊維恩場法甲更因太過大雪而改期。英超雖然唔見到有雪，不過上周六尾場見到曼城前鋒巴洛迪利同後衞尼史葛喺賽前熱身時，分別戴咗手套同冷帽；而領隊文仙尼則圍咗頸巾同着咗厚褸。曼城最終憑前鋒泰維斯喺61分鐘遠射得手，險勝史雲斯1:0；泰仔呢一腳，亦搞到對手門將禾姆喺落地拉傷鼠蹊，事後證實要唞8個星期。
禾姆、米卡李察士重創
喺20分鐘後就輪到曼城右閘米卡李察士中招，佢喺解圍時扭傷右膝，被抬出場時仲要吸氧氣，睇嚟都幾嚴重。文仙尼賽後話：「我哋要喺今個禮拜先知佢要唞幾耐。」禾姆同米卡李察士重創，加上史雲斯前鋒米捷因撞親塊面而令比賽停咗一陣，球證艾堅遜亦補番12分鐘42秒至吹完場雞，打破咗英超最長補時紀錄（阿仙奴喺10/11球季主場和利物浦1:1，場波補咗12分鐘26秒）。同日阿仙奴前鋒謝雲奴、富咸前鋒貝碧托夫同史篤城後衞馬克威爾遜亦中招。謝雲奴後備落場踢咗10分鐘，就因扭傷足踝而要喺81分鐘由艾沙維入替；貝碧托夫喺上半場撞裂肋骨，但就頂到尾，仲入一球幫球隊作客打和富丁3:3；史篤城的馬克威爾遜則喺主場打和新特蘭0:0場波，下半場初段同對手前鋒史提芬費查埋牙後受傷，懷疑係斷腳，事後要即時送院。球員喺天寒地冬下比賽，睇嚟要打醒十二分精神至得。