《撳快錢》今晚大結局，匆匆兩年的遊戲時光見證了有份揸住遙控玩的觀眾們，齊齊變晒做球迷；係，game show要玩得開心，確實當晒觀眾們係球迷就啱嘞。球迷們特徵之一係輸打贏要，球場上永遠被開刀嘅當然係球證；撳錢呢，就梗係畀貼士嘅主持啦。大家幾識才博學都好，都總有「瀨嘢」嘅時候。響APM上演的50萬之夜時，蘇絲黃故意畀山埃就固然抵鬧；但當盧覓雪答錯食物題，Icy揀錯天文台網址，又或係游清源記錯中國歷史，甚至小弟有眼不識奧雲仔響曼聯着7號，都係會惹來撳友們連珠爆發。那一刻，絕對明白晒球證們俾人炒蝦拆蟹嘅無奈。鬧你其實係投入嘅表現，每晚嘅10萬蚊獎金當然係主要原因，加上最重要嘅係，一人獨得呢個目標若果能夠實現的話，絕對不單係運氣咁簡單，而係實力嘅表現。所以點解眾多得獎者咁鍾意將勝出一刻放上網同人分享，就係威嘛；情形就同自己隊波勝出一樣咁自豪，仲要係自己有份落場踢㗎喎，非旁人嘅感受呀。之不過，又唔係話一定要獨贏先happy。試過有一排節目答啱一半題目都可以有10蚊雞易賞錢，大家都一樣好盡力咁去爭，10蚊事少，過吓贏家癮事大；情形就如你嘅愛隊打得漂亮，水銀瀉地全取3分固然perfect，之不過就算踢得一啲都唔sexy兼符碌都好，僅勝一粒就係一粒，第二朝你始終係贏家；過程係點，結局係乜其實都冇乜所謂。講番今晚last一集《撳快錢》，有30位決賽分子爭1個獨得20萬。而呢30位朋友呢，就係響過去1個月裏面，累積贏到最多獎金嘅；即是話佢哋本身已經係贏家；二來大家嘅質素都有返咁上下，應該有排鬥。不過為免夜長夢多，好似當年50萬之夜玩足4粒鐘，今晚將會以全新方式去分勝負；講實力之餘亦都要些少運氣，呢味嘢有幾主宰球賽，球迷們肯定會如數家珍，Peter Wong就直頭金句反問大家：「好波不如好運呀！」上周同參賽者見面，其中一位叔叔話若果中咗20萬，會為阿仔贖咗層樓，令人感動，不過隨住昨日財爺出招壓樓價，恐怕要做好老竇都唔易。唔緊要，一日未吹雞，一日未分勝負嘅，有緣再撳啦！文：keymannow TV主持mailto:[email protected]