無綫停印了三年的藝人月曆本來計劃下月中才推出，但相關照片昨日竟「早洩」，在網上瘋傳。無綫昨指月曆目前仍在後期製作階段，認為月曆遭非法盜用，並對事件感極度震驚，揚言要追究到底，昨日除第一時間透過法律部門跟進外，更不排除報警求助。
昔日無綫每年都會印製藝人月曆送給各大廣告客戶，以作推廣，由於月曆就算在港拍攝，製作費動輒也過百萬，是以三年前當時無綫揸弗人方逸華為慳皮決定停印。直至去年殼王陳國強接替方逸華做揸弗人後，他決定再推出無綫月曆。
按慣例，無綫藝人月曆會在下月無綫台慶前夕才推出，但昨凌晨時份，12個月的2013無綫藝人月曆相竟在網上瘋傳，包括1月打頭陣的黃宗澤、陳茵媺、徐子珊、林峯和鍾嘉欣，以及11月鄭嘉穎、黎耀祥和陳豪三位視帝拱照視后胡杏兒等。
不排除報警
相關月曆相全部未經無綫授權流出，無綫對月曆「早洩」感極度震怒，昨已透過法律部門採取行動。無綫外事部副總監曾醒明昨在電話中回應說：「啲相係非法，無綫冇授權。我哋凌晨時份發現有2013月曆喺網上流出，對事件感到相當震驚。今次月曆交畀外邊公司製作，家做緊後期工作，有啲相未落實係咪用，仲未開始印。本來月曆下月中先發出去，有人未經無綫同意非法盜用啲相，我哋已通知法律部門，要求相關網站將照片刪走，網站亦已刪走啲相。我哋法律部門會跟進事件，會追查源頭，如果我哋掌握到一啲資料，唔排除會向警方尋求協助。」
藝人變膠樣
昨凌晨時份有不少藝人在新浪微博上載或轉貼月曆相，包括有份拍攝月曆相的黃智賢、鄭裕玲、岑麗香、陳茵媺、高海寧和鍾嘉欣等，其後無綫追查源頭，發現照片最先在新浪流出後，不少相片亦被刪走。另外，不少網民看到月曆後議論紛紛，指照片經photoshop加工後，藝人樣貌顯得硬膠化。
另外，近年不少無綫藝人離巢或被王維基挖角，自然無份參與新月曆拍攝，包括佘詩曼、林保怡、馬德鐘和廖碧兒等，但蔡少芬和超級巨聲林欣彤也沒份兒卻令人感意外。
採訪：林妃