思捷（330）重陽前夕大逼供，買左思捷的朋友，真係喊都無謂。藍籌配股的多，供股卻寥寥可數。
全港1500餘間上市公司，只有49隻能晉身藍籌之列，無論市值、質素、條件，都是芸芸當中最好的一批。藍籌集資，較常採用銀團貸款或可換股債券，迫於無奈選擇配股，如果淪落到「冚家供」，一般是大fund唔肯接，冇人要，被迫齊齊焗玩。
歷來最大規模，要數09年滙控（005）、世紀大供股，當時12供5籌1400億元，一年後股價較供股前高四成。
至於供股比例最大的，為去年新世界（017）2供1集資逾百億元，股價同樣一年內爆升超過四成，兩股當年供股價折讓約四至五成。珠玉在前，今次思捷同樣以大比例、大折讓供股，有可能成功嗎？
翻查過去10年，只有9間藍籌合共11次成功供股，股榮發現，能成功首年扭轉乾坤的，只有滙控、新世界及中國海外（688），三股往後陸續有貨交。相反，供股後第一年股價沒起色的，起碼三年內都冇運行，內銀股供完股頹勢未止，就是最好例子。
思捷知錯不改難翻身
思捷今次供股，聲稱用作推動品牌轉型計劃，根據藍籌供股一年定成敗經驗，大家若相信可以一年內救得番，我會更相信今年12月21日係世界末日。滙控成功救亡、因為資產夠global，美國唔掂，歐洲好；歐洲唔得，都仲有中國、香港撐住。中海外及新世界成功，因有磚頭墊底。
思捷有乜嘢？我只係諗到out晒嘅衫，同埋可以做得你阿媽嘅model。時裝比拼，時間不容有失，務求日日新款。今次供股所得的50億元，管理層只講出是為了轉型，內容虛無縹緲。其實究竟你知唔知道自己衰乜先，H&M及ZARA一個月前已經轉季，你先開始轉款。
翻開思捷年報，昔日CEO范德施2012年度收取5381萬元酬金，連同2010至2011年度的報酬，加盟三年累收1.74億元人工，然後今年話唔撈。連舵手目光也如此短視，唯利是圖，這間公司注定一沉百踩了。最近10年，沒有供股藍籌（現價）低過供股價。紀錄是用來打破的，思捷能保「八」嗎？我沒有信心。
股榮