上周五NBA季前賽最後一個比賽日，熱火主場對黃蜂，由2003年狀元「大帝」勒邦占士大戰2012年「一眉」狀元安東尼戴維斯。客隊憑住狀元獨取24分同11個籃板球，以96:89贏波。呢場波比想像中激烈得多，好可能都係因為前者嘅一個訪問。
大帝被踢面 熱火負黃蜂
話說「大帝」早前接受訪問，話贏到總冠軍唔代表啲乜嘢，自己目標只得一個，就係要成為G.O.A.T（Greatest of All Time）。唔知呢一句係咪刺激咗黃蜂一班球員，今場比賽一開波就上晒火，打得比平日上心。場波一開始，勒邦占士已經唔係好順，第一個攻勢就扭傷右足踝；傷勢唔算嚴重，佢都打咗28分鐘，有19分同8個籃板球，但係就炒咗兩次樽。
第3節佢同對手中鋒R盧比斯搶籃板球嗰時，仲畀後者一腳踢中塊面；賽後「大帝」都話自己都感受到場波有幾激，而自己都打得夠好：「今場波真係好激烈，畀人踢咗一嘢，第一次進攻又扭傷咗，有8次鏟籃失敗，我平時比賽表現好得多。」知恥近乎勇，所以大帝迷唔使驚，你哋偶像一定會反彈！
至於A李華士，呢個星期真係黑仔到爆，上周一對小馬扭傷右腳，今場上陣都受傷勢困擾，6投2中得6分，打到第3節諗住同R盧比斯做give and go，點知同嘜佢嘅查米斯撞一撞之後，一嘢跪落地，又扭親右腳。可幸嘅係，呢位選秀第10選仲可以自己行出場，應該冇骨折。
林瘋回勇領火箭滅魔
另外，火箭控衞林書豪同日，以13分、5次助攻，帶領球隊作客以108:92大炒魔術，狀態開始回勇。季前賽亦喺上周五完結，之後球員休息幾日，就迎接周二嘅NBA揭幕戰。