中國「金花」李娜喺上星期五嘅土耳其女子職業網球員年終賽，0:2輸咗畀現任「1姐」艾莎倫嘉，連續第2年分組賽出局，娜姐亦打完今季全部賽事，好多人都話佢舊年贏完法網後，成績不進則退，娜姐就冇咁好氣，話家乜都唔理，放完大假先算！
娜姐對艾莎倫嘉嘅分組賽，其實喺一場生死戰，贏嘅一方就會以紅組次名出線4強。娜姐首盤一度領前4:2，不過「尖叫女王」好快就追成4:4，第1盤仲反勝7:6，之後再贏6:3，盤數贏2:0，以2勝1負嘅成績晉級4強硬撼舒拉寶娃，而且仲攞夠分，首次成為年終世界排名第1，真係威爆。
娜姐就只係以世界排名第7完成今季賽事，好多記者都追問佢滿唔滿意，佢就答：「一早plan好跟住兩個星期乜都唔理，唔練波，只想放假。」兜完一個圈，佢先答今年打得比舊年穩定，算有進步，希望明年成績更好啦！「細威」莎蓮娜在昨日的4強，以6:2及6:1輕取拉雲絲卡，率先晉級決賽。