長遠策略督導委員會成員蔡涯棉自認係標準梁粉，自願主動放風，話可以考慮撤回在啟德區興建體育城嘅項目，此言一出，立時觸動體育界神經，紛紛抗議。以前有體育界大老霍英東發話，邊度有特區政府領導人唔俾番幾分薄面呀！依家霍公子雖然冇咁大牙力，但既然佢自視為體育界領導，點可以俾蔡涯棉剃眼眉，於是在報紙發表文章（幾罕見也）力挺啟德體育城，另一位元老級人馬許晉奎仲話要上街抗議㖭。假如梁振英先生真的能夠將霍許兩大家族成員刺激到上街示威，佢都幾本事，呢兩位素來擁護建制，與政府只講合作，不搞對抗嘅，呢次聽聞啟德體育城可能不保，真係老馬也會發火。
蔡涯棉為梁振英赴湯蹈火，在所不辭，見體育界大力反彈，連忙話係自己意思啫，唔係政府意思，與政府無關，完全唔關梁特首與運房局、發展局事。有咁好嘅盟友不惜放風受箭，特首面子絲毫無損，振英哥都幾好運。
但因此就觸發市民醒覺到，知道體育城可能係大白象工程，以後其他類似項目實在好難上馬，正中特區政府下懷。講真句，香港人喜歡有體育城還是喜歡將地皮興建房屋、公屋，恐怕還是以喜歡後者居多。香港體育不振，乃眾所周知事實，例如政府大球場當年打馬會心口（好似係四億元）重建大球場，依家一年有幾多場波在大球場踢，有幾多上座率？最初話可以兼用搞大型演唱會，後來因為附近居民投訴噪音，乜演唱會都唔搞得，成個球場日日只係曬太陽，成為「開揚景觀」，助長附近豪宅升值，又例如紅磡體育館，裏頭有幾多場演唱會呀？有幾多場球賽呀？紅磡體育館正名為紅磡演唱館就適合得多。既然政府難以壓制霍公子、許大董（前馬會董事）及體育界，左丁山借箸代謀，不如咁嘞，為咗填地皮條數，不如一邊興建啟德體育城，一面拆卸掃桿埔政府大球場，騰出空地興建居屋或公屋（其實興建類似太古城就最啱，不過一講就會惹起官商勾結之煽情閒話），擔保受中下層居民歡迎。香港根本唔需要兩個國際級球場，冇理由啟德體育城與大球場並存，兩個大項目齊齊曬太陽，浪費維修管理費用嘅唧。