飲唔飲Starbucks都要公投。有中大學生早前反對喺善衡書院嘅餐廳Petit Cafe賣星巴克咖啡，事件升格到由學生公投決定，由學生決定星巴克咖啡有冇得留低。公投噚日結束，結果七成半同學都撐星巴克。有人話對結果冇眼睇，亦有人話呢次係理智嘅勝利。
杯葛星巴克嘅學生出咗本小冊子，數臭星巴克點無良法，仲開埋facebook page反星巴克，結果370位學生參與公投，其中76%支持星巴克留低，16%反對，7%棄權，通過「中大善衡書院學生會支持在善衡書院餐廳範圍內售賣有C.A.F.E.認證嘅星巴克咖啡」。結果代表乜？可能因為同學仔覺得星巴克並非無良，又或者純粹係佢哋咖啡癮作怪啩。