西班牙過去與意大利情況相似，過去因本土聯賽強盛，球星都在本國效力，出國搵食多為二、三線球員，但隨住英超強勢，西班牙、意大利等國也陷經濟危機，時移勢易，到英超搵食才是理想出路。
右後衞費拿可算是西班牙兵登陸英超的大師兄，98年由巴塞隆拿轉投車仔，當時年紀已28歲，適逢車路士頗為聯合國化，費拿與拿索斯組成出擊力甚勇的兩閘組合，也算成功，他也為車路士帶來了兩屆英足盃冠軍。
紅軍曾西班牙化
但受言語、飲食文化等差異影響，加上英超體力化的踢法，令西班牙兵吃不消，千禧年初甚多西班牙兵失敗例子，曼聯門將列卡度、車路士中場迪盧卡斯、紐卡素前鋒馬些連奴，都是過客；阿仙奴03年動用1,700萬鎊收購西維爾翼鋒雷恩斯，但此子也因溝通問題，3季後就借至皇家馬德里。
當然西班牙其實不乏好球員，但要在英超發光，有同聲同氣的領隊也十分重要。04年利物浦從華倫西亞挖走賓尼迪斯，開創了狂牛時代，沙比阿朗素、路爾斯加西亞、艾比路亞及連拿等西班牙兵分別來投，開創狂牛風，最成功就是07年從馬體會收購費蘭度托利斯，102場比賽為紅軍攻入65球，之後轉會至車路士，更為利物浦帶來5,000萬鎊轉會費收入。
文：牽牛