上期講《城市追擊》，今期點可以唔提《今日睇真D》？我知，係亞視嚟嘅喂，但曾幾何時都威過㗎，之唔係解剖外星人嗰期囉！話說95年，有間外國公司聲稱攞到1947年美國發現外星人嘅解剖紀錄片，亞視買咗香港獨家播映權，安排喺《今日睇真D》度播，港人抱住獵奇心態爭住睇，震撼全城。
不過亞視解剖嘅唔係外星人，而係將條片解剖拆件，然後逐啲逐啲播出街，吊吓觀眾癮。至於班主持亦勞苦功高，林建明（沙姐）、歐錦棠、林祖輝個個上晒身咁，用把懶凝重嘅聲去對待件事，嚇到班師奶標冷汗。亞視見收得，索性派人去羅茲威爾採訪，又請專家曹宏威嚟拆解，前所未有咁認真。點知條片出咗街，好快就俾周刊踢爆段片係流嘅，嗰間外國公司最後承認造假，事件演變成終極鬧劇。
沙姐認揼波鐘
沙姐噚日接受電話訪問，問佢信唔信呢條片？佢笑笑口話：「初時我好信，但睇到條片後，我唔係懷疑，只係有小小研究，究竟係真係假呢？呢件事喺我心目中仍然係一個謎，始終呢個世界有好多好奇怪嘅事發生。不過，當年亞視將條片分開五日播就真係有啲揼波鐘，拖得太長。」
撰文：阿Wow
