現年25歲嘅2011年度港姐亞軍朱希敏，今年初同07年落選港男李善恆撻着之後經常甜蜜晒恩愛，好似前晚咁，記者又喺銅鑼灣見佢哋兩個拍拖煙韌，李善恆全程陪女友揀化妝品同揀衫，成個阿四咁。
買$150靚衫
前晚7點半，束起頭髮同戴住副黑框眼鏡嘅朱希敏，着住條短褲仔同李善恆行銅鑼灣，佢哋手拖手行去化妝品店MAC，李善恆好識做咁企埋一邊等女友揀化妝品，但朱希敏行咗幾個圈之後都係冇幫襯，空手離開。之後佢哋又拖住手行去渣甸坊一間好平民化嘅時裝店睇女裝，唔使講今次又係李善恆陪女友睇衫，認真體貼。朱希敏揀衫嘅時候都有問男友意見，而揀咗20分鐘之後，朱希敏揀咗件價值150蚊嘅衫。記者以為李善恆會幫女友畀錢，不過，朱希敏好快攞咗自己個銀包出嚟找數。買完衫，佢兩個就去咗附近嘅一壽司開餐撐枱腳。
採訪、攝影：梁繼光
