對水墨的認識只屬皮毛，感覺是這麼的可望而不可即，既深不可測，就敬而遠之。與資深藝術家及香港水墨會策劃總監呂豐雅聊天，方知在你我仍停留在寫「上大人孔乙己」之際，經歷二千年與詩合一的中國水墨，竟在香港經歷過天翻地覆的轉型重生。 記者：陳慧敏 攝影：伍慶泉、楊錦文
早在1920年至1940年的政權轉變年代，再數之後的文革內亂，國內的文藝工作者、書法家、電影人都因種種政治及經濟原因跑到香港，讓香港揹上了孕育繪畫及書法的歷史任務。傳統門第制的畫技，遇上自由的表達空間及生活環境、西方畫派的新思潮，就似水中滴墨，迅速渲染更新。講水墨變革，一疋布咁長，跳入精采高潮處，就由四十年代講起，概括而言，代表人物有四。
呂壽琨：一筆一座山
四五十年代，在廣州考獲經濟學士學位的嶺南派畫家呂壽琨來到香港，在油麻地小輪做稽查，負責收船飛與點算乘客的工作，大畫家淪落到做數飛仔？呂豐雅：「無辦法喎，不過傳聞當年油麻地小輪喺碼頭劃咗個位置畀佢畫畫，所以佢畫埋好多維港兩岸風景畫。初時佢啲畫都好傳統，有山、有水、有屋、有漁港風景。」呂壽琨的爸爸呂燦銘經營古董字畫，所以他自小就有機會看到好多名畫真迹，也受西方印象派畫技影響，善用紙筆墨臨摹古畫：「呂壽琨主張唔再臨摹中國畫，將畫面濃縮成一個個Form，不具象，半抽象，要畫嘅地方係Positive Image，留白嘅地方係Negative Image，用強烈留白效果去表現空間感，一直發展到六七十年代《禪畫》嘅簡約筆觸，佢一筆已經係一座山，是為最高境界。」
王無邪：切割重組
呂壽琨於六七十年代發起新水墨運動，拒絕老師畫甚麼我就得畫甚麼的門第制，徒弟王無邪發揚之。呂豐雅：「當年王無邪喺美國讀完書，畫作有設計同分析家嘅味道，同呂壽琨互相呼應。王無邪將山水畫淨化成幾條線和點，或變成一塊石，後來仲將畫面分割，用設計手法將山勢重組。佢曉咁樣重組同擺置，喺當時而言創意好高。」
劉國松：革毛筆的命
劉國松在六十年代在港教書，他的突破，聽到都令人躍躍欲試。呂豐雅：「佢利用好多物料作畫，例如喺水缸滴墨再拓印，又試過抽走粗紙裏面嘅筋脈，剩低落嚟嘅白色空間就成為山脈紋理，水同墨之間會互相排斥。」當時人類初登月球，他把眼光昇華到太空去觀察，山上有七個太陽。時人質疑不是水墨畫，但那卻是十足的水墨哲理，呂豐雅：「嗰種留白概念，你要有好強嘅水墨根底先做到出嚟，當年劉國松提議『革毛筆的命』，要丟咗支毛筆，當然佢無真係丟咗支毛筆啦，只係唔好完全倚賴毛筆咁解。」
梁巨廷：甩繩馬騮
再數，有現任康樂及文化事務處視覺藝術榮譽顧問梁巨廷，他的筆法更「甩繩馬騮」。呂豐雅：「梁巨廷係設計師又係板畫家，善玩線條，佢會用熱熔劑將印刷品嘅圖案移印，之後再一筆筆描畫，最出名係將國畫紙染色、捽皺，用衣車幾層幾層咁縫起，變成一張大紙巾咁，手法好現代好直接。」這樣還能稱得上畫？「嗱，以家嘅繪畫定義，越來越唔一定要有筆，喺繪畫世界裏面，方法可以無窮無盡，移印、電腦畫面甚至打印，都可以歸納為現代繪畫手法。」於是乎，今日的水墨繼衝出亞洲、地球、太陽系後，還突破所有物理框框，走入哲學。
走入畫卷裏 景賢里
整個水墨畫變革史大致這樣，其實在不遠的眼前，或有機會讓你看真一點多一點。還有三日，景賢里巡迴諮詢就會結束，這幢在2007年被列為法定古蹟的建築物，最快到2013年就會知道將變身成水墨館或具香港特色的證婚禮堂。這幢古樓由澳洲華僑李寶麟女士和丈夫岑日初先生在1937年興建，原名「禧廬」，於1978年轉售時易名「景賢里」，中西混血，外觀是中式紅磚綠瓦，室內有雲石地磚木地板，結構及用料卻是西方的鋼筋水泥，反映了本港戰前中西合璧的建築風格。有說這是中國文藝復興式建築，但香港中文大學建築學院院長何培彬則指此為「折衷派」手法，起樓快手夾硬淨，求中西配合共存，具實用性質居多。
呂豐雅期望未來可在這裏展出他向多個收藏家及名家借來的5,500幅水墨作品。如果水墨館可以成事，那園裏七十多株樹及泳池邊的百年白蘭樹都得以保留，而現有泳池底則會挖深十多米作為「創藝館」，展出新世代或數碼水墨一類作品。呂豐雅：「古人作畫，係希望人可以跟住畫作遊歷名山大川，家去博物館，感覺總係冷冰冰，以前文人上山，唱和一番，興致到就攤開幅畫，樹下作詩。我想喺景賢里重新塑造呢種文人行山賞畫嘅感覺。
咁當然，家我唔可以就咁拎住幅畫睇，幅幅幾十萬真係無辦法，但我可以搵老師喺花園作畫，喺池邊重造曲水流觴畫面。」何謂曲水流觴？此乃古人遊戲，呂豐雅：「即係好似王羲之《蘭亭序》所寫，一班詩人喺溪邊傾偈，酒杯喺流水裏面飄來飄去，飄到去邊個手上都好，都要先吟首詩飲酒，希望畀到遊人一個可行、可望、可遊、可居嘅感覺。」景賢里地址：香港司徒拔道45號查詢： http://www.heritage.gov.hk
