近日唔少城中名人開始入貨買冬裝，但唔知大家有冇發覺，今年好多零售牌子都提早減價？不時以新裝示人嘅新民黨葉劉淑儀，日前收到某豪華品牌嘅六折減價卡。但葉劉從呢張折扣卡竟看出玄機：下年經濟猶如吳克儉……啊，係唔得掂至真。
八方日前見葉太已經換上秋裝，順道交換吓今年冬裝情報。葉劉話近日收到著名英國時裝品牌Aquascutum通知話有六折減價。呢間舖係英國百年老店，以乾濕褸聞名，聽聞英國前首相戴卓爾夫人都好鍾意，由鄭秀文任亞太區代言人。
本來掃平貨係好事，但葉劉一副憂戚，原來以佢嘅時裝經驗之談，發現若果個市道好，唔少名牌唔到聖誕節都唔會有折，家吓10月底已經劈價，證明唔少人睇淡未來經濟啦！因此就算有靚衫着，望住市道水盡鵝飛，冇人有心情欣賞自己，葉劉都肯定冇心機啦。
唔好以為葉太只愛貴價衫，原來佢係西班牙品牌Zara嘅粉絲，貪啲款夠晒trendy而價格相宜，豪氣話幾百蚊一件褸，着一季唔鍾意咪擺埋一邊囉。