梁特首在立法會致辭，講到明「積極不干預」係模糊不清，「大市場，小政府」不合時宜，不合目前情況需要，政府要講G2G，適度干預市場，適度有為。講到咁明白，如何落實？佢手下一員悍將胡紅玉律師以強積金局主席身份，配合消委會嘅強積金收費調查，乘機發圍，話要考慮倡議立法為受託人設收費上限、增設非牟利受託人，或引入公營機構提供投資產品。嘩嘩嘩，為受託人設收費上限，咪即係價格管制？咁都得？左丁山雖無厚愛於強積金基金管理人，對佢地嘅收費冇乜研究，但基於自由市場原則，幾大都反對任何價格管制措施。胡紅玉唔好以為利用消委會調查做政治工具，乘機推行梁振英之「適度干預」，以突顯政府有為呀，價格管制一旦在任何行業施行，必定對香港經濟產生不良後果，承受苦楚、後果嘅係香港市民。強逼行業降低收費，最佳方法係透過市場機制，用競爭嚟趕走高收費低回報嘅基金，政府不懂市場，胡亂為收費設限，只會衍生另類問題，外國早有不少類似經驗。胡紅玉講價格管制，第一步係強積金基金管理費啫，下一步容乜易到黃錦星講兩電限制收費，跟住吳克儉講教科書限制收費，然後陳茂波張炳良一齊講新樓盤限量限呎之外，還要限價？巴士地鐵小巴要限價？反對價格管制係大原則問題，千萬不能跟從民粹主義、破壞香港自由經濟。至於「引入公營機構提供投資產品」，亦係得啖笑，香港有甚麼公營機構可提供投資產品？數來數去只得金管局，唔通胡紅玉想話叫埋強積金局做埋基金投資管理，球員係佢，球證又係佢？都幾荒謬噃。金管局根本無法子同時提供管理幾十隻基金產品，一旦向強積金戶口開放，只會疲於奔命，做死自己，變成不務正業，忽略捍衞聯繫匯率呢個偉大任務！消委會發動攻擊強積金，傳媒MCC咁響應，大駡強積金一輪，其實未必個個強積金戶口都輸嘅，左丁山好奇之下，睇吓自己嗰份有幾多錢，在十月十九日結餘367,000元，供款十一年10個月，共142個月共284,000元，咦，多出29.2%喎，叫做有得賺吖。2000年1月3日恒指係16,962點，2012年10月22日，恒指係21,697點，12年升咗27.9%，自己份強積金算係跑贏大市。