袁詠儀（靚靚）寧放縱老公張智霖（Chilam）玩車好過玩女人，愛家庭的他婚後言行謹慎，不過每次換過百萬新車都非常爽手，印證怕老婆會發達。Chilam珍惜與靚靚及乖仔張慕童建立的三口之家，他雖評老婆只有50分，但加埋自己的50分，正好是100分滿分夫妻，肉麻中滲滿情趣，靚靚點會唔受！ 撰文：比華利
張智霖和袁詠儀已結婚11年，囝囝張慕童（魔童）下月也6歲。外間一直覺得靚靚是嚴妻，對丈夫和兒子管束多多，Chilam直認不諱：「都會㗎，佢係多重身份，係我另一半，又係朋友、親人同家長，男人好怪，心目中永遠想做小朋友，有時玩起上嚟好猖狂，我哋班朋友會玩兩日兩夜鬥消磨精力。」
貪玩有底線
經過逾10年磨合，靚靚已接受Chilam貪玩個性，他大爆從前半夜經常接老婆追魂call，他說：「呢啲好小兒科，不過家佢唔會再打嚟，佢明白我江山易改本性難移。」靚靚讓Chilam放縱，Chilam也尊重老婆有分寸，他說：「佢最怕我搞婚外情啫。」所以他無論多爛玩也不會踩界。
Chilam主演的新片《天生愛情狂》已上映，他形容自己與靚靚皆是天生愛情狂，並肉麻說：「佢唔准我唔愛佢，睇吓大家點睇天生愛情狂嘅標準，兩個人能夠喺埋一齊咁耐，對愛情都必定有一份執着先得，我同佢大家都50分，加埋就正好100分。」
嚴母出孝兒
Chilam雖未圓追女夢，但已感激靚靚為張家生下魔童這位小帥哥，有子萬事足的他說：「我人生呢一刻好滿足，我覺得已經好完整。冇話邊個排先，老婆同囝囝已融為一體。」魔童是獨生子，Chilam寵愛也點到即止，三口之家，他表示自己是101分慈父，靚靚則是惡媽，Chilam說：「靚靚真係好嚴，真係有需要，佢呢排返咗內地拍戲，囝囝就橫蠻咗啲，令我好懷念佢阿媽喺度嘅日子，囝囝守規矩好多，我都要調教一下。」
圈中不少星爸媽都有子女繼承衣鉢，Chilam卻反對兒子入行，他說：「呢行係好被動嘅工作，需要好多運氣，就算幾努力同有才華，所有嘢唔成正比，唔係話想就做得到。」Chilam還用高塔作比喻，他說：「大家只係睇到塔上得咗嘅人，塔下面嘅人我都識唔少，其實好易變唔得嗰班，一旦入咗行唔得，要行番出去要加倍痛若。」自問好到加零一的爸爸，又怎捨得愛子受苦。
回味咀心悠BB
張智霖曾於09年邀請過劉心悠參演其歌曲《妳太善良》，這對俊男美女組合，事隔三年，因為蕭定一投資、葉念琛執導電影《天生愛情狂》的撮合，讓Chilam和心悠再結片緣演情侶。
爆老婆拍床戲
Chilam大讚心悠BB好咀，他回味多場接吻戲說：「我哋咀得好真實，好多時睇親熱戲，作為觀眾會藐佢拍得就住就住，唔夠真實，但我同心悠嘅咀戲係有愛喺當中，我哋咀得好肉緊。」心悠BB跟老婆袁詠儀比較誰好咀？Chilam賣口乖：「個個都咁好咀，個個都有唔同感覺。」
拍戲時，靚靚有來監場嗎？Chilam搞笑說：「冇，儍嘅咩，佢係唔會影響佢嘅搵食工具，講笑真係搵第二樣，佢唔會『叉禍』佢嘅生意。」Chilam也不過問靚靚拍戲尺度，他說：「佢近排返內地拍戲，啱啱同個台灣男演員拍咗成日床戲，佢大呻好攰，我仲笑話益咗佢。」