焦點故事：300萬Budget<br>模市區搵樓記

焦點故事：300萬Budget
模市區搵樓記

曾參選港姐的模黎雪瑩（Snow）住在大埔，但一直想進軍市區私樓，同Honey築愛巢，幾年來，兩口子儲得幾十萬元，滿以為上車在望，於是相約小記，往東西九龍四圍走，希望搵到300萬元以下的上車盤，卻沒料到經過「梁十招」、「5000個白表免補地價」、「QE3」之後，300萬元市區上車盤幾乎冇得揀，年初仍被視為200萬元上車盤的九龍灣得寶花園，竟然叫價已近300萬元！叫價癲，盤源缺，不禁想問天：「樓神，你想點？」
記者：陳家雄、葉淑貞　攝影：黃耀興
模特兒：Snow（Pure Models）

第一站：深水埗

市區物業當中，九龍區住宅售價一般較相宜，第一站先來深水埗。在區內打滾二十年、做慣街坊生意的細行經紀翁大姐說：「個市癲咗！大行都打電話來搵舊樓。」當她聽到Snow想搵間企理少少的300萬元以下上車盤，即刻嘆一口氣：「唉！區內入場費較低的美寧中心、美居中心，叫價都超過300萬元，合乎你預算的盤，唔係冇，不過係舊樓，舊到呢……實在推介唔過。」她又說，元州街附近有個唐樓單位，面積520方呎，叫價268萬元，賣花唔讚花香，大姐忍不住指叫價是「黐線！」但好奇心驅使，相約睇樓，沒料到翌日晨早收到大姐來電：「唔好意思，個盤昨晚出租了。」

嘉裕居較企理

於是搵另一間細行安迪物業的Tony仔（鄭淦祿），果然幫到手，「有！嘉裕居中層A室，面積481方呎，叫價298萬元，企理靚仔，不過要提提你，這類單幢樓的實用率不足七成。」 Snow即時問：「有冇其他選擇？」 Tony仔答：「再揀，就數到君凱豪庭低層戶，732方呎叫價360萬元。」

第二站：九龍灣

Snow有點不耐煩，「我想要少少規模的市區私樓，點解唔帶我去睇出晒名嘅上車盤淘大花園？」小記只好引述利嘉閣淘大分行蘇嘉畯的回應：「淘大花園最低入場費為M座低層7室，371方呎，叫價298萬元，不過連租約，冇得即買即住。交吉盤最低為O座中層1室，480方呎，叫價350萬元，似乎唔啱budget（預算）喎！」

交吉盤選擇少

一街之隔，細行林立，行入馬波地產，經紀說：「農曆新年前，得寶花園仲有200萬元以下放盤，但現在要搵250萬元以下都有難度。不過預算是300萬元以下，仍有少少選擇，但交吉盤唔多。」Snow頓感失望：「好多人都知，得寶花園是200萬元上車盤，現在竟然要200幾萬，仲要冇得點揀……」
經過連日搵盤，發現市區仍有小量300萬元以下放盤，以區域計如樂富、黃大仙、九龍城、北角及筲箕灣等，Snow睇完張清單，面露不悅之情：「原來儲咁多年錢，都只係可以買舊區舊樓、300幾呎細單位、居屋……」

第三站：港島東

港島區樓價平均較九龍區略貴，西區在港鐵概念帶動下樓價大躍進，由西環殺落灣仔，再到銅鑼灣及大坑，有不少重建物業，新舊樓皆有價，300萬元以下之選近乎絕迹。再往東行，港島東尚有平價盤，但這些平盤環境較差，部份僅得300餘方呎，故雖為「二字頭」，呎價計落甚至跟屋苑差不多，絕對唔平。Snow話基本上可打消在港島上車念頭。

可考慮北角唐樓

做街坊生意的北角昇暉地產許先生說，大行有一手新樓做，細行特別難撈，「上個月鰂魚涌有間中型行，成個月得二十萬數！我估有幾間細行（10月中）仲未開單。」北角區「二字頭」(200餘萬元)物業基本上要到月園街才搵到，「那條街開了很多建材公司，環境較差，地面又凹凸不平，老人家行路唔方便，推架BB車都難，所以樓價會平啲。」月園街兩旁的唐樓，迷你上車盤有嘉運大廈及明月大廈，都是300方呎左右。
論北角焦點平盤，物業前方為北角邨地皮的嘉威大廈，日前A座高層5室，335方呎，享海景，業主反價至322萬元沽出，呎價9612元，創屋苑新高。
而西灣河及筲箕灣有不少高齡單幢樓，亦有部份樓價低於300萬元的選擇，如44年樓齡的太安樓，或僅300方呎的單幢樓。

九龍灣：兩房改一房

九龍灣得寶花園有8座共2016伙，逾半面積是300多方呎，向來被視為市區上車盤，今年年初仍有200萬元以下放盤，但不足一年內，樓價已攀升至近300萬元，但家連300萬元以下放盤都少之又少！
馬波地產任成鎮劈頭就說：「好難囉！你仲要搵鎖匙盤，真係冇幾多間，就算約，都未必有得睇。」

方形小客廳，企理雅致。

兩房改一房，再偷客廳小量空間，擴闊主人房。

廚房設備新淨齊全。

任成鎮說：「今年農曆新年前，得寶花園仍有200萬元以下上車盤，例如300餘方呎單位，叫價由180萬元至190萬元，估唔到，家呢類細單位叫價全部『二字頭』。」他表示，該屋苑現有約25個交吉放盤，平均呎價7300元，入場費由250萬元至370萬元，其中10個交吉放盤為300萬元以下，入場費最低為C座高層4室，面積343方呎，叫價258萬元，呎價7522元。
介紹單位為D座低層6室，面積397方呎，向東南，在樓群中可望港鐵九龍灣站，原則兩房間隔，屋主改為一房，縮細客廳空間，從而擴闊房間內櫳，放置四呎半雙人床後，仍可擺放衣櫃。業主叫價298萬元，呎價7506元。同類單位今年年初，叫價205萬元，9個月後，叫價躍升50%。同座頂層連天台單位，成交價298萬元。

由主人房外望，在樓與樓之間望到港鐵九龍灣站。

浴廁用企缸，有氣窗助空氣流通。

得寶花園屋苑資料

地址：九龍灣牛頭角道3號
座數：8座
樓層：33至40層
每層伙數：8伙
單位數量：2016個
建築面積：311方呎至530方呎
實用率：73至83%
間隔：1至2房
落成：1984年
發展商：新世界及恒地
資料來源：馬波地產
電郵：mailto:[email protected]

九龍灣：交吉盤內櫳企理

美聯蘇嘉畯表示，九龍灣淘大花園約有120個放盤，平均呎價7500元至7800元，「300萬盤好多都是連租約、冇樓睇。」而且絕大部份放盤是350萬元以上，350萬元以下的放盤不足10個，最低入場費的交吉盤為O座中層1室，面積480方呎，叫價350萬元，呎價7292元，「好多上車客見冇乜盤睇，都會留意附近的居屋。」
其中位處振華道的居屋安基苑，鄰近淘大花園，由4幢物業組成，提供920伙，樓齡26至28年，單位面積495至701方呎，間隔兩及三房，放盤少，用家主導市場。
介紹一個中層單位，530方呎，屬交吉放盤，客飯廳四正企理，內櫳雅緻，地板牆身整潔。兩房間隔，其中一房外望巴士站。惟大門有玄關與廳之間為主力牆，令到裝修改則存在困難。自由市場叫價320萬元，呎價6038元。

長形廳實用見使。

單位可遠望獅子山，視野開揚。

兩個房間面積相若，其中一個房間有兩扇窗。

安基苑屋苑資料

地址：牛頭角振華道20號
座數：4座
樓層：29層
每層伙數：8伙
單位數量：920個
建築面積：495方呎至710方呎
實用率：82%
間隔：2至3房
落成：1984年
發展商：房委會
資料來源：美聯
電郵：mailto:[email protected]

藍田：地板牆身翻新

利嘉閣陳維進表示，藍田區300萬元以下放盤約有30個，主要是居屋，分佈在康華苑及康栢苑，需由觀塘站或藍田站駁一程小巴前往，而且放盤多為400多方呎細戶，平均呎價5000元。介紹一個康華苑低層13室，面積516方呎，屋主重新裝修地板牆身，廚廁用料一併更換，間隔一房，但客廳預留空間可多間一細房，自由市場叫價250萬元，呎價4845元。該屋苑新近一宗成交為今年9月，B座高層10室，面積574方呎，以290萬元成交，呎價5052元。