仲有一個星期多啲，沙田鞍泰區補選就投票，唔知禮義廉招文亮係咪驚輸驚到上腦，近日頻頻用埋啲揦渣招嚟對付民主黨游月華。噚日黃昏就有位禮義廉嘅女區議員，喺港鐵大水坑站附近一條隧道入面，逼迫游月華嘅義工拆橫額，義工唔肯就範，個區議員就大嗌非禮，然後仲自己報埋警。好彩嗰度有閉路電視，警察睇完之後都知道冇料到。
唔單止咁，招文亮為博曝光仲不斷狙擊游月華，好似專登喺游月華嘅橫額前面戙易拉架，又用自己張海報冚住游月華張海報。游月華仲話，試過夜晚佢貼咗嘅海報，第二朝就「被消失」咗，但估唔到會離譜到屈人非禮啫，所以佢會考慮反投訴禮義廉誣告兼浪費警力。