新一屆立法會妖邪當道，議員為爭「每周膠神」之位各出其謀，眼見亂用「焚書坑儒」都不敵黨友「掌厲魂」，人稱Tree Gun嘅鍾樹根噚日趁住一周之末，施展渾身解數，一開波先發明新詞「子烏虛有」，再上晒頭大鬧立法會秘書處啲動議亂咁揳，最終發現原來佢呱呱嘈要嘅文件就放咗喺佢眼前，成功以文盲嘅識見力挽狂瀾，搶到膠神寶座。
話說噚日喺立法會資訊科技及廣播事務委員會討論數碼電台被中聯辦干預一事，樹膠左王上身發表偉論：「成朝我聽到咩政治壓力，咩外部壓力，全部都係第二、第三者聽番嚟，憑一句說話就演繹，我家知道咩係道聽途說，咩係子烏虛有。」
議政水平低 中英水平更低
就係呢個新詞「子烏虛有」，全場上下笑爆肚，社民連梁國雄即時高喊：「係子虛烏有呀！」樹膠改正後，繼續滿肚火，批評主席黃毓民主持會議嘅手法好差：「你比區議會主席主持會議更差，你究竟點樣做主席呀！」查實樹根當日投票支持毓民做主席，家吓係咪後悔先。
樹根又不滿成立專責委員會調查事件嘅動議，放咗喺文件中唔起眼嘅地方，但其實動議一早已整整齊齊送交畀議員過目，連毓民都請樹膠睇咗文件先嚟開會，做議員唔好做到成嚿雲。
樹膠議政水平唔單止低，早前佢啲卡片串錯Legislative同Administrative已經成為政壇笑柄，仲疑似搞港獨將「the People's Republic of China」錯寫為「the People's Republic of Hong Kong」，又將議員叫官員下台比喻為焚書坑儒，唔知佢創黨主席曾鈺成見到佢嘅手下表現成咁，有冇嘔到成地血？
mailto:[email protected]
黐樹根語錄
「葉建源要吳克儉落台係焚書坑儒。」
「國民教育指引係有好多好嘢，呢個世界係冇洗腦㗎！」
「鄭經翰話受到政治壓力，係子『烏』虛有。」