特惠生果金一役令建制派四分五裂，團體「愛護香港力量」向來都係擁護政府嘅頭號粉絲，以聲討公民黨為己任，但近日見到有建制派偏離愛黨愛港嘅路線，反對政府嘅特惠生果金方案，當然唔多高興，盛傳係愛港力成員嘅Gigi Mak喺facebook大鬧反對政府方案嘅嫻姐卑鄙，批評佢係政棍一名，背後另有目的。
Gigi Mak對嫻姐不留情面，批評佢已經變質。有其他相信都係愛港力嘅成員不斷和應，話對嫻姐好失望，仲警告工聯會如果最終投反對票唔支持方案，屆時一定動員圍堵工聯會。不過，嫻姐係政治老手，見到佢噚日氣定神閒提出將中止待續動議，就知佢未驚過啦。