聯交所資料顯示，太古A（019）大股東施懷雅家族其中一位太子爺施銘倫（Merlin Swire）前日（24號）勁沽自己揸住嘅太古A、太古B（087）同埋太古地產（1972）股份，合共套現1.3億。施銘倫本身又係太古非常務董事，連太子爺都勁沽貨，乜事呀？太古公關隨即解畫，話太子爺唔係睇淡上市公司前景或者有乜後着，今次純粹係太子爺私人資產重組，想三間上市公司嘅股權全部由英國太古集團持有，成件事就係咁簡單。查實施銘倫私人持股真係好少，太古A得5.88萬股，平均價92.628蚊，套現544.6萬；沽太地就套現1818.5萬，仲有14萬股未沽。至於套現最多係隻太古B，佢喺場外以每股18蚊，沽晒618萬股，攞番1.1億，批貨全部沽畀英國太古集團。太古集團最新喺太古A同B嘅持股量分別升至28.7%同68.49%。