【本報訊】「特惠生果金」變了「長者生活津貼」，讓無數長者空歡喜一場。40個民間團體昨在立法會福利事務委員會公聽會上，痛陳長者生活津貼「兩不像」，力促撤銷入息及資產審查、設全民退休保障。
長者：越講越夭心夭肺
勞工及福利局局長張建宗依舊企硬，堅稱資產審查已非常寬鬆，沒調整空間。有長者聽罷怒斥「民意講咗千句萬句，你聽到咩？」立法會福利事務委員會昨召開上半場公聽會，40個發言團體中絕大部份反對政府現方案。荃灣長者聯合組成員余春妹稱最初聽到梁振英提議增設特惠生果金「好開心」，但「越講越夭心夭肺，好似心都刮埋出嚟」。她轟政府非真正為長者着想，「如果真心想改善我哋生活，就唔應該有資產審查」。關愛長者大聯盟代表蔡錦昌則說，長者為免拖累子女，「好多人會儲番十幾廿萬棺材本」，雖然連骨灰位都未必夠錢買，卻可能因資產超額而無法申領長者生活津貼，質疑政府「有冇必要查得咁嚴格？」75歲的失明婆婆胡錦萍勞碌大半生，辛苦儲到23萬，僅超出上限，「棺材本嚟！我唔捨得使呢筆錢」，只好繼續靠傷殘津貼過活。
女社工為何喜華感慚愧
青年關注長者貧窮研究社批評長者生活津貼「越扶越貧，分化社會」。政府不斷強調申報程序簡單，長者很容易拿到津貼，「呃長者！如果真係咁易，點解唔直接取消？」她最後忍唔住落淚，稱社工出身的何喜華和葉兆輝等竟只看經濟利益，為現方案護航，「作為社工我覺得好慚愧」。香港社會工作學生聯會代表陳柏亨質疑設審查制度是將長者視為負擔，「如果你有100蚊喺袋，係咪要check清楚阿爸阿媽係咪連水都冇得飲，先分半個仙畀佢？」他指長者年輕時為社會付出很多，應該得到尊重。城大學生關注組委員陳德運則說，年輕人願意承擔社會責任，「作為大學生，我願意交出我嘅錢嚟養老人家」。民意一面倒，但勞工及福利事務局局長張建宗卻視若無睹，堅稱現方案得到社會大多數支持，重申必須設入息及資產審查，「明白有長者失望，但希望大家包容」。他形容政府「好謙虛」，硬闖只為令長者盡早領到津貼，「我哋唔做散彈槍，而係來福槍，聚焦幫助真正有需要嘅長者」，即被在場代表諷刺是非驢非馬「蠱惑的槍」。