雖然身在熱廚房，但八方相信，為狼班子瘦咗成個碼嘅林鄭月娥，真係冇乜時間去買餸；噚日佢拍住酒駕波去到觀塘，參加「星期四玩轉駿業街之綠生活/藝術」啟動禮時，雙雙唔講嘢、只買嘢，林鄭更趁機可以過吓手癮買餸，感受買餸之樂。查實呢個場內，好多攤檔主要賣有機菜，八方發現林鄭對有機菜都幾熱衷，打個轉就用咗超過330蚊，買咗秋葵、火龍果、冬瓜、豆奶同芽菜；同樣大手掃貨嘅仲有酒駕波，佢仲畀林鄭豪花多20蚊購物㖭。
咁啱得咁蹺，早前被林鄭下令、因為違建及侵佔官地而拆招牌嘅大棠荔枝山莊，同樣都有擺檔賣菜噃。只見檔主得悉「大敵」林鄭走近之時，嗱嗱聲攞定包有機芽菜，企喺面前等林鄭途經時硬銷。八方所見，林鄭似乎都有啲愕然，一副唔係太好意思唔買咁款，最終當然硬食，唔知佢會唔會驗吓有冇加料，先敢好好享用？