講親福士甲蟲，大家每次總不厭其煩由二戰講起；同樣經歷過動盪時代、到今天55歲依然活躍嘅的骰City Car，仲有Fiat 500。最近代理更引入兩款「好色」新車，全Pink開篷版必然令女士尖叫，就算男士，望住限量版BlackJack，都會度出100個理由帶佢返屋企。 記者：徐影龍 攝影：林栢鈞 模特兒：Vivian、[email protected]
磨砂黑魂限量20部
呢兩年由太古接手代理，真係積極好多，Fiat 500新車新色停不了，繼早前剛推出紅白Pop BiColor，據知，下月又將有軚盤+/-波雙色版登場㖭。呢個禮拜，更一口氣推出兩大玩色之作。首先是這部全港限量20架嘅「21點」（BlackJack），雖然黑色Fiat 500唔係咩新鮮事，但佢最特別在採用磨砂質感焗漆，連輪圈都係啞黑色，配上鮮紅色制動卡鉗，令呢架的骰小車，添上不少跑味，男人見到好難唔心動，唔係只得Abarth先改得有跑味嘅，就算原廠Fiat 500，一樣可以好Sporty。黑色中控台襯火紅色座椅，內櫳繼續刺激你視覺神經，加上Sport掣同電鍍波棍，坐上車內戰意自自然然會提升。此外，有齊多功能軚環、全電動天窗，仲包你五年原廠保養，幾吸引喎。
Kitty Pink招搖過市
講完男人嘢，輪到冧硬全港粉紅迷同Kitty迷嘅Pink版登場。其實全車徹頭徹尾Pink到盡，搶眼度已經達十級，揸住佢招搖過市，想唔矚目都難！本來呢類咁極端嘅顏色，一係愛到佢死，一係怕太搶眼，毋須多費唇舌，不過佢特別在係開篷版，成件事又有啲唔同。好似試坐完嘅Vivian，就話本身唔算好迷粉紅色，不過㩒吓個掣，軟篷頂即自動收納，柔和陽光照射車廂，Vivian仲讚話行車時伴隨微凉嘅風，好似遊車河咁舒服喎。車身及內櫳佈局無大變，一貫Fiat 500風格，內外一堆電鍍飾邊仍然配襯得宜，而駕駛艙一大塊面板，亦換上令面粉紅色，相當討好。
Fiat 500 BlackJack限量版及Fiat 500 Pink Edition規格 引擎：1,368cc直四 馬力：100bhp/6,000rpm 扭力：131Nm/4,250rpm 傳動：五速+/-波箱
售價：$269,888（BlackJack本周車展預訂價$249,888） Fiat and Alfa Romeo車展日期：10月27、28日 地點：尖沙嘴海港城 查詢：太古汽車（2921 9999）
女途人喪拍
花臣停不了
1.09年推出Barbie版紀念芭比誕生50年，全球限量60部。內櫳以水晶點綴，浮誇！
2.上年日內瓦車展展出的概念車，車身雄渾霸氣，仲係裝上最新TwinAir渦輪引擎。
3.改裝商打造的極豪華版，車身及內櫳加入大量K金物料。
4.今年終於有長陣500L消息，車款為五門揭背版，預計年尾歐洲率先上市。
5&6.眾多變奏版中最有話題性可謂同Gucci互乘。黑/白車身、硬頂/開篷都有到港。
7.開篷版車側有大大個「Gucci」字樣。
8.座椅亦唔少得Gucci標記。
9.開篷版Gucci拉花改在軟篷頂，一直延伸至車尾。
10.早前推出的紅白配Fiat 500 Pop BiColor，屬限量特別版。
11.內櫳也貫徹紅白設計。12. 紅白撞色由頭燈上下分割，夠特別。
