黃翠如同黃浩然等一班演員噚日喺將軍澳電視廣播城試造型，佢之前已經擔正做《心路GPS》女主角，家又擔正拍無綫新劇《師父．明白了》，由有線過檔無綫嘅黃翠如聲價十倍，唔單止一劇接一劇做女主角，跟住又同洪永城齊齊去拍旅遊特輯，唔怪得有報道話佢係高層余詠珊嘅愛將，因為咁搞到其他同事睇唔過眼，群起杯葛佢。馮仁昭梗係問番黃翠如，佢例牌否認：「冇杯葛，我同啲同事關係好好，噚晚仲一齊食大閘蟹兼慶祝我生日。」不過佢承認呢啲新聞令佢有壓力：「我預咗喇，只希望做好啲唔會再有，我呢啲小人物係因為有title先多人識，我冇後台，只係掂到啲好勁嘅後台。」
黃浩然唔做親生仔
戴咗頭套試造型嘅黃浩然話拍完《初五啟市錄》先會剃頭，有冇擔心影響頭髮再生能力？佢話：「唔會，反而仲濃密咗。」黃浩然一直喺無綫嘅發展唔錯，問佢會唔會考慮簽無綫做親生仔？佢話：「暫時唔會喇，家嘅合作關係好好，點都係主力拍無綫劇。」