康宏理財（1019）12月中搬竇喇，佢哋家租緊港島東中心三層，但業主太古地產（1972）加租，惟有搵地方搬，新近租咗北角電氣道169號四層，做咗大租戶，攞埋大廈命名權。康宏主席王利民出名鬼馬，懶有型咁將大廈英文名改為「＠Convoy」，中文名叫「康宏匯」。康宏中人講，王主席噚日同員工開大會時，宣佈呢個消息，當大家問佢點解加個「＠」，佢話冇得解，一個字：「型」喎，全場即刻爆笑！咁啱市場噚日傳出呢座大廈剛以34億元易手，好在康宏一早簽晒合約，轉業主應該唔影響佢為座大廈命名。呢座大廈本來叫宏利保險中心，估唔到改名都係同行。康宏亦唔係第一次搬，公司多年前租用銅鑼灣利園，07年搬入港島東中心，同事已開始執嘢準備年底再搬了。