南韓阿叔歌手PSY紅到去聯合國，佢之前帶挈老竇間半導體設備公司DI Corp股價爆升超過七倍，截至上周一（15號）升到13100韓圜（約92港元）高位。
經理人公司股價曾爆升
升得咁誇張，全因市場憧憬PSY呢個金叵羅會被當成資產注入DI Corp，但話明係憧憬，即係總有破滅嘅時候，隻股自嗰日起即掉頭向下，噚日收報6850韓圜（約48港元），從高位直插48%。
PSY注入半導體設備公司，呢個古仔點都講唔通，要炒都炒番啲真係關事嘅，所以呢，PSY所屬經理人公司YG Entertainment股價，自《江南Style》發行後最多曾升1.3倍，就算近期由高位回落，但計落都仲有超過六成升幅。
前排肥PSY喺首爾開露天演唱會，當眾隊咗支真露，帶挈燒酒製造商海特真露由本月低位升11%。PSY下個月尾來港表演，即管睇吓呢股乜乜style熱潮持續得幾耐！