過大海！又少咗個理由，澳門台山水佬榮搶灘香港！簡單評語，喺澳門佢係大牌檔中富豪飯堂，到咗香港，唔再牌檔格，反走中高格調路線，不過唯一不變係佢個辣汁雜菌花蛤鍋，一鍋照舊擦得飽幾條大漢，中辣大辣照樣難以取捨，同正宗澳門師傅100%原著風味！記者：朱崇德 攝影：蔡家輝、朱崇德
雙蟹下鍋 鮮美濃香
花蛤蟹鍋呢個名好似聽咗好多年，不過好多人唔知，原來係由澳門台山水佬榮所創及打開名堂！聽澳門師傅華哥講：「我哋其實係特意揀選佐敦火鍋街開店，不過開店後發覺附近忽然多咗好多花蛤蟹鍋！」
過江猛龍刻意嚟挑機，當然有秘技而有恃無恐，原來廚房師傅一半嚟自澳門，年資多有兩年或以上，要做到原著風味先至落山來港！呢個鍋要和味，第一步係唔慳得！花蛤雖然看似隻隻一樣，但原來有泥蛤同沙蛤之分：「泥蛤味淡常有沙，相反沙蛤味道鮮美可口，不過價錢貴上近倍，不過我哋仍選用沙蛤！」花蛤用靚嘢，華哥話湯底材料亦唔弱。「食火鍋、易上火！所以我哋仲會選用七、八種靚菇菌類作平衡，例如靈芝菇、牛肝菌、雞油菌及老人頭等，以此入鍋，就會將燥火壓低！」至於老火湯底係以豬肉及雞所熬製，老實！呷一口湯底，清甜鮮美、醇厚溫順直抵喉頭間，尾後感還有陣陣甜味！
不過要試真章，就不得不自費下多兩隻蟹！「我哋建議係用一肉蟹、一膏蟹，分別取其肉之鮮美、膏之濃香！」爐火鼎沸間，湯汁不斷收乾，但蟹味越來越出，那種甘甜味美，亦不斷升溫！不過大家可能還遺漏了一點，就係取自湖南辣椒醬的「辣汁」！網誌有人說味道如泰國的冬蔭功，但我覺得辣中帶鮮甜係似，不過冬蔭功就辣中帶點虛浮，但這個鍋卻多了老火湯的一種回味及厚實感，是中式湯水所獨有！小記試過微辣，覺得能保持其他配料原味，同食至最後的一鍋湯還保持鮮美的口感，辣？不辣？真係令人難以割捨！
喺火鍋場度睇見黑松露，好多人都先入為主認為係假貨！香港主理人黃康先生表示：「可能大家畀人呃得多吧！來佬貨的黑松露，薄如蟬翼的一片，可是叫價上$2,000！我們這裏的黑松露，產自雲南！」雖然味道與口感，兩者未必可同日而語，但用作湯料，會先烘乾再打汁，雖然放得極小量，但黑松露的獨有香氣，隔着半張枱都聞到！入口更是一片芳香，建議火鍋料為魚類海產，感覺更形匹配及鮮美！
澳門台山水佬榮火鍋專家（2327 8282）
地址：佐敦道37號C、D佐敦中心3至4字樓