鼠王芬同政界元秋蔣麗芸呢對建制九西孖寶，成為為市民提供免費娛樂，總算冇白立法會人工㗎嘞。噚日佢哋更加一齊出動，同場現身尖沙嘴街坊福利會會慶晚宴；呢期被「元秋」搶盡風頭嘅鼠王芬，終於威番次，成功令元秋倉皇敗走。既然喺九龍西插旗在先，鼠王芬喺九西團體內嘅知名度自然勁過元秋，而尖沙嘴街坊福利會，亦好明顯係鼠王芬嘅主場，一嚟到就好似返娘家咁受歡迎；致辭時亦賣口乖話專登將會慶晚宴排喺時間表第一位，冧到台下班粉絲笑晒。反觀元秋，就好明顯有啲外人feel，要出動貓紙，好行貨咁話會慶係非常有意思嘅重大日子，台下觀眾自然行貨式畀啲反應就算。唔知係咪自知唔夠受歡迎，元秋最後連表演都唔睇就撇，聲稱仲有下一場要趕喎。