地球好危險，難怪財爺鬍鬚曾搬咗去火星住！咪噓八方住啦，八方又點會唔知，火星未有入境處處理港人移民申請呢？查實話鬍鬚曾做咗火星人，只係一個官場近期熱爆嘅比喻啫：乜大家見唔到，喺狼振英同林鄭月娥頻頻現身為爭議政策撲火嘅時候，鬍鬚曾消失得無影無踨咩？好似唔係同老細狼英及林鄭活在同一地球上咁呀。
匿埋寫吓網誌
點解官場中人有此感覺？有官場中人話，特惠生果金嘅爭拗升溫，作為政府大掌櫃，係咪應該都要同狼英同林鄭一齊出嚟頂；至少都講吓如果撤銷資產審查，會對庫房有幾大財政負擔，同梁班子一齊發功吖。點知佢除咗喺本月初，輕描淡寫講咗句領取特惠生果金要有審查，再喺日前喺網誌寫咗幾句撐要有審查外，幾乎唔見咗影。查實喺早前梁班子遇上各式風波中箭期間，有政界中人已經不時問：鬍鬚曾到底去咗邊？點解佢唔使一齊出嚟頂？最近更有政界中人覺得佢自我隱形，似乎唔想被戰火波及，難怪有官場中人會笑笑口話：「佢可能搬咗去火星，唔知呢度有乜事發生。」八方聽聞，狼英已經接受鬍鬚曾離群嘅事實，始終鬍鬚曾有得留任，都係阿爺欽點，唔係因為同佢有親。至於林鄭，以前明明under佢，今屆忽然head住自己，試問點會唔介意？又確實有好多人辦證明，幫狼英冇乜好結果；換轉八方係鬍鬚曾，都會選擇隱形啦。mailto:[email protected]