黃秋生一句：「我不知道羅志祥（小豬）是誰！」搞到小豬班粉絲群起喺微博鬧爆秋生，秋生又將惡意中傷嘅留言轉發番畀小豬睇。仲以為呢件事會令到小豬好心煩，但早前佢有機會同緋聞女友楊丞琳一齊拍廣告，喺現場仲識講笑話伊人開心，心情似乎唔太差。
小豬同楊丞琳係09年拍《海派甜心》傳撻着，雖然佢哋死口唔認拍拖，但人前人後都好老友。上周五呢對緋聞情侶再度合體拍廣告搵真銀，下晝兩點幾，楊丞琳乘坐保母車先行抵達台北鴻臣片廠，化妝搞咗一粒鐘，先入廠拍個人畫面。下晝六點左右，小豬終於現身，佢哋一埋位已經合拍度十足，係鏡頭前互動笑得甜蜜，之後就應導演要求雙頰漸靠近，跟住四目相交，現場彌漫濃濃情意。
香港濕平收穫勁
小豬同楊丞琳好有默契，大約兩個鐘就完成拍攝，之後一齊接受廠商安排嘅訪問，小豬再度發揮搞笑本色，一問一答都逗得楊丞琳哈哈大笑。佢哋嘅經理人蔣承縉當然否認佢哋有翻撻，哈哈笑回應：「他們太熟了，真的沒可能。」仲話楊丞琳遲啲嚟香港開演唱會，真係忙到無時間拍拖，講開香港個唱，之前楊丞琳嚟香港為演唱會開記者會期間，佢就去咗I.T.濕平，離開時足足有七大袋，大豐收！
撰文﹕丁寧