每年出道的新人多不勝數，要於新人群中脫穎而出當然要落足苦功，今年出道的新女子組合Super Girls便深明此道，主打跳舞路線的她們，原來自出道後每星期也會練舞三至五晚，非常落力！講到年尾頒獎禮，她們表示隨遇而安，最重要是希望別人看到她們的努力！
訪問當日已是晚上十時多，Super Girls的五位成員包括Aka、Jessica、Yanny、Cheronna及Heidi等仍在位於旺角的排舞室不斷為新歌《話愛就愛》重複排練。
只見穿上3吋高踭鞋及熱褲上陣的Super Girls，在排練時頻做出不少頗具難度的動作，動作整齊之餘又大擺S形甫士，視覺享受十足。
意見分歧
Super Girls五人看似跳得輕鬆整齊，其實當中下過不少苦功，其中成員Aka表示：「我哋五個女仔一開始唔係個個都識跳舞，好彩大家都好守望相助，又肯放時間落去練，比較叻嗰啲都好畀耐性教冇咁叻嘅，大家感情其實都係一路咁培養出嚟。」
人多自然意見多，她們亦坦承有不少意見不合的時候，Cheronna說：「意見不合一定有嘅，不過每次都係好少嘅事，好快大家都會冇事同打成一片，家直情越嚟越少呢啲小不和。」
談到下月推出新碟，五人異口同聲表示終於夢想成真，至於是否賣得，Heidi謂：「隻碟籌備得耐，放好多心機，我哋同公司都對大家有信心。」
採訪：文國駿 攝影：陳慧安