金管局多次出手入市護盤，連日資金流入逾百億元，成為各界焦點。綜合報章分析，主因歐債危機早前傳到爆煲咁滯，現在卻沒有預期咁差，加上QE3後大量平錢充斥，這些游資泊在零息存款多時，一早已想四出找投資機會，只是礙於歐債陰霾唔出手住。至於所謂炒脫鈎，正常一點的香港人都知係得個吹字，以今時今日的財金班子，冇人敢吹風脫鈎，萬一出事邊個孭得起？總結而言，似乎都是流入炒股債偏多。另外又有人估游資會轉炒商業物業，個人並不相信，現在歐美便宜物業遍地，國際游資會湧來買極貴的物業？資金入市炒股，應該錯不了，只是大市連升10日後，高位或有震盪，間中或有震倉，昨日一些被外資唱好炒上的股票如宏華集團（196）、中國無線（2369），明顯有獲利回吐，尤其宏華今年一路炒上未見顯着回吐，外資係時候食糊。
營業額料穩步回升
不過市場上平股殘股仍然一地都係，最明顯例子之一是霸王集團（1338），兩年前股價仍有6元，昨日只得0.74元，高位唔見九成，即使由今年初高位1.61元計，仍然唔見一半以上，作為一隻日用品股，未免跌得太誇張。霸王去年業績慘不忍睹，營業額由前年的14.7億元（人民幣．下同）大跌至8.8億元，但應該已見底，證券界估計今年會回升至9.1億元，明年再回升至12.4億元兼轉虧為盈，有咁強的收入，不難估計當業績復蘇，股價會升幾個開。歐陽風