港股完成十連升壯舉，但好多股份都高開低收，散水味濃，噚日講嘅散戶入場指標，真係唔到你唔信。個股升跌比例36:64，係咁多日升市以嚟，下跌股份比例最高，停一停唞一唞訊息明顯。既然預計個市要回氣，可趁低吸納績優股作中長線部署，主打戴咪耳機及音響耳機業務嘅富士高（927），早前發盈喜，預期截至9月底止中期業績，按年將有增長。富士高舊年全年賺5645萬銀，增長88%，下半年盈利較上半年高出6倍，增長勢頭之勁不言而喻。集團轉攻高毛利嘅藍牙耳機，更加係供不應求，現時相關耳機佔總收入近五成，賺錢能力大大提高，相信今年盈利再倍增並非難事，屆時PE會回落至單位數；富士高另一吸引之處在於派息高，現價息率超過8厘，防守力一流。睇圖表，富士高舊年6月由1.20元起步，至10月中高見2.51元，累積升幅1.1倍，喺高位回調0.382倍嘅2元買入，中線再破頂應無難度。唐牛