DaDa（陳靜）早前憑電影《低俗喜劇》「爆炸糖」一角彈出，令男fans數目大增，如果胸襟廣闊的DaDa主動擁抱，相信沒有太多雄性動物可以拒絕，除了DaDa的愛貓「小虎」。訪問當日無論DaDa怎樣，小虎可能怕陌生，不斷掙扎，請主人食檸檬！雖然如此，DaDa對小虎千依百順，全因小虎曾陪她度過哭得崩潰的日子。 撰文：文國駿
爆炸糖女神DaDa早前於荔枝角寓所的會所公園接受訪問，除了帶同小虎現身外，還有一位特別嘉賓，就是室友飼養的四歲松鼠狗仔Amor。雖然小虎跟Amor沒有太多交流，但DaDa坦言牠們關係一時一樣：「佢哋喺屋企有時會一齊玩到癲㗎，不過有時又會無視大家嘅存在，最好嘅就係佢哋未試過打交，啲人成日話貓狗唔可以共處一室，我都想澄清係得嘅，只不過要畀多少少時間佢哋適應一吓。」
屋內屋外兩個樣
當DaDa打算抱起小虎影相時，這隻超過15磅的巨貓不斷扭計掙扎，令DaDa弄得成頭汗才能人貓成功合照，小虎由主人抱着也經常左閃右避，實難想像牠是DaDa口中的公關貓，難怪DaDa笑言一帶小虎出街便很容易失禮，她說：「佢喺屋企真係唔同啲㗎，係公關貓，負責迎賓，搓圓㩒扁都冇詐型，嗲到不得了。」
DaDa不經不覺已養了小虎七年，回想最初，DaDa本來打算買小虎來陪伴自己從小已開始養的另一隻貓MiMi，可是小虎最後竟然踢走元配，非常有計！DaDa說：「我由細開始已經養MiMi，七年前我怕佢悶，打算買多隻貓陪佢，買咗小虎返嚟之後佢非常霸道，同MiMi成日打交，搞到最後MiMi要返我媽咪屋企住，成功霸晒我間屋！」
陪瞓陪喊最抵錫
小虎以前由DaDa及前男友一同飼養，即使現在已跟前男友分手，但對方也會經常探望小虎，可想而知小虎如何得人歡心，DaDa說：「咁我以前男友可以話係小虎爸爸嘛，佢都好錫小虎而且我哋大家又係朋友，佢嚟探小虎當然冇問題！」
問DaDa與小虎有那些難忘時刻？她透露早年入行時因為自己搬了出來住，加上未適應娛樂圈中的種種壓力，曾有一段時間經常在家哭到崩潰，那段日子幸好有小虎相伴，所以即是小虎平日怎樣搗蛋，DaDa甘願成為貓奴：「嗰陣自己唔識得處理壓力，日日開工好攰，返到屋企就忍唔住喊，小虎一知我喊，就算自己玩緊都會走過嚟哄我同瞓喺我隔籬，佢可以話係陪伴我過咗最艱難嘅一段日子。」
鬧情緒發老脾
陳靜出道後工作量日多，問她是否比以往少了時間陪伴愛貓？DaDa坦言近年自己較以往多工作，未能經常在家陪小虎玩，而小虎鬧情緒不理睬她，亦令她很內疚：「唔知係咪我成日唔喺屋企，就算係有時間返一返屋企，唞唔夠半個鐘又要出門口做嘢。」
DaDa續說：「呢排有時我返屋企，小虎寧願同Amor玩都唔係好睬我，可能鬧緊情緒！我嚟緊如果做完嘢都會第一時間返屋企陪佢㗎喇，希望佢快啲睬番我啦！」