幫恒地（012）賣樓嘅營業部總經理林達民，自從月初爆出同鄺美雲（Cally）拍拖之後旋即爆紅，仲俾人起底話佢係「冇樓樓神」，不過轉個頭佢即刻買間大埔淺月灣屋仔，唔知係想築定愛巢，定係費事俾人話佢冇樓揸手呢？
2200萬買淺月灣
土地註冊處資料顯示，林達民本月中以2200萬買入淺月灣一間屋仔，面積接近3500平方呎。華華噚日搵林達民求證，問佢點解買淺月灣、Cally有冇份㗎咁，佢冇否認，只係不停話「私人嘢唔答」；至於鄺美雲，佢助手話佢出差了，no comment咁話！每逢有名人拍拖，大家都習慣幫男女雙方比拼身家，Cally係珠寶店老闆，每次現身公眾場合必定身光頸靚，周身名貴珠寶，有傳聞話佢身家有5億銀。至於林達民呢位財經人物，要知佢有幾多錢身家，主要係靠睇年報同查佢有乜物業資產。可惜林達民唔係恒地董事，年報睇唔到佢年薪幾多，雖然大家知道四叔厚待員工，但林達民負責賣樓，收入多少同賣樓成績掛鈎，好難估。至於物業，林生好似冇做業主好耐，於是乎，佢同Cally真係冇得比較囉。李華華mailto:[email protected]
