歷來本港大專院校邀請學者來港講述當代中國，幾乎必定係講宏觀大勢、歷史文化、經濟發展、社會結構演變等大題目。新亞書院院長信廣來教授係哲學專家，推動研究當代中國，成立「新亞當代中國講座」，一改以前習慣，唔請學者講大題目，第一炮就搵到內地著名作家、導演及記者涂俏女士做演講嘉賓，講述今日中國社會實況及深層次社會問題，如深圳二奶村、愛滋病、赴港生子等等中國社會病。
昨日由於篇幅關係，漏寫咗演講時間，今日補充番，第一講：「底層體驗與探索：野百合也想春天」，十月二十六日上午十一時三十分在中大邵逸夫堂舉行，由馬旭飛教授主持。第二講：「探究歷史，叩問人性：從二奶村到赴港生子」，十月二十七日下午六時三十分在銅鑼灣中央圖書館地下演講廳舉行。兩講皆以普通話講述，歡迎公眾聽講。
內地女士點解要做二奶？涂俏話：「她們除了青春的胴體之外，在這個當下的中國，幾乎一無所有。換言之，她們站在深圳的大街上，想要討生活的話，一個月（2001年）最多只能賺八百元。所以，有一個香港男人願意『娶』她，每月給她至少五千元家用，還有甚麼比這更好的呢？」
涂俏假扮超齡二奶，親近真正二奶，陪怨婦到口岸尋夫，見識了二奶「群落」嘅眾生相，由於內地不可能允許用「二奶村」呢個名詞，所以佢出書之時，就用咗「苦婚──『卧底女俠』60天隱性採訪實錄」，對各方面都不討好，被人批評，但人在內地，唔照規矩辦事就要做烈士㗎嘞，唔通大肆宣傳深圳有條二奶村咩。
深圳嘅「二奶村」可能只有香港男人熟悉，但赴港生子，就每個香港人都知講乜。涂俏寫過一個報告：《赴港生子：9對大陸夫妻的香港生育史》，明白到二奶村與二奶之出現，源於農村貧窮，年青女性離開農村到深圳以身體換錢，是一個貧窮問題。赴港生子呢？好大程度上係因為夫妻富裕，係一個富裕衍生出來嘅問題囉！涂俏在第二講會細說佢嘅卧底報道，包括黑市炒賣恒生指數、驚天命案、尋求安全感的孕婦移民潮，好值得本港嘅記者、傳媒人、社工、政策研究人士去聽一聽，增加對內地當局不喜歡揭露的問題的認識。