資金前排炒到去中資股，炒咗冇耐，又輪到資產股（包括本地地產股同收租股）強番，呢批股份9月中開始出現超過一個月嘅調整，前日一棍突破，就一下子打番上高位，中線走勢非常強。晉佳相信，資產股先係今次升浪嘅主角。講開資產股，前排推介合和實業（054），不過由於之前升得太多，又冇乜點回，所以呢一浸轉強就冇佢份，呢一刻，寧願吼一啲整固完成嘅資產股，例如嘉華國際（173）就值得買入。前排報道講到，俊和發展（711）打算以最少4億元，出售港鐵彩虹站上蓋商場匯八坊連停車場，消息令俊和股價一連3日轉弱，就連資產股爆上嘅前日，俊和一樣冇份升。就咁睇嚟，投資者鍾情資產股，自然就唔鍾意出售資產嘅股份，反而成手物業仲要繼續買，投資者就Like到不得了。如果講近期積極增持土地儲備嘅發展商，就有嘉華國際，佢8月份以11.69億元奪得將軍澳66D1區地皮，啱啱又同信和置業（083）聯手吸納元朗朗屏地皮，作價超過17億元，每呎樓面地價3260元，睇嚟嘉國會積極買資產，實在啱晒潮流。
中線目標價5.2元
根據摩通8月尾發表嘅報告分析，嘉國嘅資產組合，包括62億元嘅上海投資物業組合，香港同上海嘅物業發展項目，總值超過150億元，至於持有銀河娛樂（027）嘅股份價值都接近40億元，加埋超過250億，淨負債就只得廿幾億銀，而嘉國嘅市值就只係99億元。換言之，股價相對每股資產淨值（NAV）折讓達到55%左右，同03年至今平均折讓水平相若。不過，家陣資產股當道，嘉國股價相對每股NAV折讓幅度，冇理由去到平均值就見頂，根據摩通嘅數據，如果股價相對每股NAV折讓幅度收窄到40%，就係平均數加一個標準差嘅偏高水平，晉佳覺得可以用呢個水平作為中線目標價，咁就可以上望5.20元，現價值得買入，如果跌穿今轉升浪起步位3.53元就止蝕。另外，晉佳愛股之一正通汽車（1728）股價似起動，醞釀突破圓底頸線，走勢大好，今日買入睇嚟時間啱啱好，維持年底前目標價7蚊。晉佳本欄逢周一、三及五刊出