醜聞纏身嘅發展局局長陳茂波，已經冇咩誠信兼威望可言，噚日出席立法會會議，更兩度被市民狙擊。有市民先喺佢發言時，喺公眾席叫囂話佢就新界東北計劃「講大話」；其後佢喺立法會一樓走廊扑咪期間，再被原班市民喺二樓電梯口高空突襲，高叫「陳茂波下台」，不滿佢聯同老婆搞劏房發財又唔認、去上水諮詢新界東北發展時又做騷。被突襲嘅酒駕波望望呢班人係咩料後即時「搵窿狷」，匆匆扑兩咪就閃人。尷尬嘅嘢又何止呢樣呢？唐唐家臣林大輝噚日向昔日「兄弟」酒駕波發炮，問佢劏房同板間房究竟有乜分別？
謬論連連 講多錯多
酒駕波書面回覆話，劏房係指單位被分間成兩個或以上嘅獨立小單位、有獨立廁所、甚至有煮食地方；板間房就係用木板分間成小房間，「一般」係冇獨立廁所或煮食地方，住戶共用廁所同廚房。據《建築物條例》，未經批准做建築工程搞「劏房」屬嚴重罪行，知驚冇？