憑住獨有獅吼功，政界元秋蔣麗芸「保儉」成功兼喺網上熱爆；查實元秋都好自豪憑此獨門武功一炮而紅，仲話老竇蔣震都同自己一樣咁大聲。好可惜吖，爆紅嘅佢竟然嗌「收山」，噚日話日後會將音量收細，可能係唔想立法會同事受罪，話晒噪音都係污染嚟㗎嘛。
家唔少立法會議員，私下都叫蔣麗芸做元秋。好似上星期五立法會內，何秀蘭同毛孟靜悄悄話期間，講到政界元秋講嘢真係好好笑；點知一講元秋，元秋就到，蔣麗芸忽然喺佢兩位後面現身，笑笑口話：「我係元秋，咁又點吖？」睇嚟唔介意有呢個封號。
獨門武功遺傳老竇
唔知係咪想畀觀眾有一個最美好嘅回憶，元秋噚日竟然話，日後會將音量收細。嘩！咁佢以獅吼功力撐吳得掂留任，「使唔使炒咗佢吖？」呢啲奇景，咪成為絕響？點解唔再表演「獨門武功」？原來元秋都嫌自己太大聲，認同要克制吓。究竟點解有此神功？元秋話老竇蔣震都好大聲，唔通係家傳秘技，抑或山東人特性？
各位元秋粉絲唔好失望住，事關元秋重申，就算係細聲啲，都繼續be myself，仲引述好多朋友撐佢上次表現唔錯，話呢個咪就係佢哋認識嘅蔣麗芸囉，更好自豪唔少人喺網上share佢嘅發言；睇嚟政界元秋嘅巨獻，陸續有嚟。
mailto:[email protected]