思捷（330）已經今時唔同往日。講緊嘅唔只係股價同盈利能力，應該話，係公司嘅本質唔同咗。以前思捷見人，由邢李㷧到范德施年代，都係幾名西裝褸襯牛仔褲的型佬行出嚟。最近一次業績，大家見到嘅居然係以前唔點理會思捷事務的非執行主席柯清輝和副主席鄭明訓。有跟咗思捷多年的分析員朋友話，見到公司家嘅管理層，齋講個look都已經唔似係一間講求trendy嘅國際級時裝品牌公司。似咩？玩財技嘅二三線股份囉。市場已經唔太關心思捷的基本因素，反而想知道最近幾個月密密掃貨的人，到底搞緊乜。自柯清輝6月13日坐正做主席開始，中南、海通呢啲broker就不停狂掃思捷，短短三個月掃咗1.78%及7.6%，市值14億元。喺思捷業務完全睇唔到曙光情況下，咁樣建倉法，海迪斷估背後高人都唔係一般投資者。家仲突然搞埋大比例供股，博你唔供咁款，呢啲劇本真係似曾相識，只係估唔到出現喺呢隻藍籌身上。芬佬朋友話呢隻嘢唔知內情的人，已經唔敢碰，連沽空都收斂咗好多。觀乎老柯過往在資本市場活動經驗，海迪都係想提醒大家，小心啲。海迪