唔好以為淨係八卦雜誌、模寫真先會賣斷市，正正經經嘅書一樣可以好搶手。消委會噚日話，近排收到唔少市民反映話買唔到10月號《選擇》月刊（圖）；有見及此，即刻決定加印，下個月1號又有得賣嘞。其實今期刊印嘅數量差唔多有成3萬本，一半畀訂戶、一半喺市面賣，賣咗個幾禮拜就斷市，估計係因為今期主力講打工仔最關心嘅強積金，邊隻賺得多同蝕得甘有關。原來過去咁多年，《選擇》都試過幾次賣斷市，其中一次就係首次做避孕套測試，結果賣咗成7.3萬本書；有次做冷氣機測試、以及05年驗到廁紙有菌，都令《選擇》供不應求，由此可以反映市民最關心啲咩囉。