多得美國印鈔機不停運作，熱錢湧港，已發癲嘅樓市火上加油。樓價升不停，人工呢？一年加幾個巴仙都有嘅。腳踏實地打份工一圓買樓夢，似乎不可能。身邊已上車嘅80後朋友，除專業人士、做投行之類高薪人士外，其他一般打工仔，份首期都係靠長工以外渠道賺返嚟，大家不妨參考吓。一：炒股，資金唔使多，有料之人，資本更可逐步滾大，加上家熱錢湧港，港股勢強，勝算比早前大，不過前提係要你有時間，炒股前做足功課。二：炒iPhone，家下一部16GB iPhone5回收價有8800蚊，如果成功抽到「IPO」，一日淨賺3213蚊，回報率高達57%，比起股票仲好炒，而且蝕嘅機會極低。三：創業，連買樓嘅本都冇，又如何創業？今時今日，有創意的話，創業唔使好多錢嘅，好似日本最近好流行「人體廣告」，即係有人「出賣肉體」，畀廣告商貼宣傳貼紙上面、手、大脾之類，之後呢個人肉廣告牌要周圍行街，然後收廣告費。事實證明，食腦甚至可無本生利。Fifi本欄逢周二、四刊出