戰友們炒到㷫恰恰，但噚日唐牛見到兩個現象，不得不提醒大家一句︰散戶回來了。首先，長駐喺銀行大利市機前嘅C9，開始談笑風生，兼主動分享冧把；其次，有啲從來唔玩股票嘅朋友，竟然主動whatsapp討教行情。咁嘅情況下，唐牛會選擇以換馬形式繼續炒，即現水平唔會再加注，始終散戶都入市，即離調整日子不遠矣。大折讓H股成為市場焦點，東北電（042）狂升44%最誇張；風電設備股金風科技（2208）具備大折讓及殘股特性，相信好快會俾資金睇中。國務院重提核電中長期發展規劃，國家能源局亦傳出要扶持光伏業，風電獲國策支持，只係時間問題。金風2010年以17.98元招股上市，噚日收報3.24元，累積跌幅超過八成，只因連年盈警，但喺炒見底憧憬下，壞消息可以係好消息，加上H股較A股折讓達55%，又多一個炒作概念，日線圖呈大圓底，成交亦見急增，上四字頭不是夢。唐牛