開季6戰不勝，暫列聯賽榜尾2嘅晨曦，日前與教練巴貝利「分手」後，昨正式由助教招重文（左五）、陳發枝（右三）及譚兆偉「3巨頭」執教；但文仔話佢哋3個教頭冇分上下，最緊要就係重振球隊士氣，領軍重上勝軌！
雖然佢哋都係臨危受命，但文仔笑笑口咁話唔會有壓力︰「我哋家已經冇得再低㗎嘞，只有上返去，我信得過我班球員！好似我當年踢二合咁，頭幾場又係咁輸跌到包尾，但我哋最後都可以升返上嚟做爭標組。」佢又話，球隊踢法唔會有太大改變，但首要都係改善練習氣氛同提升士氣。的確，唔計噚日因事缺席操練嘅偉仔，兩位教練同班球員都相當融洽，氣氛唔錯。且看經過呢個禮拜磨合，晨曦下月3號作客太陽飛馬，能否旗開得勝啦！