香港銀行業近年成日被人話做大唔做細，銀行公會最近搞展覽，地點唔係中環，而係荃灣荃新天地，話想拉近同市民嘅距離，講番銀行業同香港發展點樣息息相關喎。呢個「銀行伴你．穩步成長」懷舊展覽噚日開始，為期五日至到28號，展品有舊紙幣、存摺簿、豬仔錢罌、銀行以前用嘅工具同電視廣告圖片，相信好多人都曾經擁有相中嘅獅子錢罌，好易喚起集體回憶。
櫃員機多過便利店
睇番展覽內容，其中一個資料幾有趣，話全港家有3137部自動櫃員機，係便利店嘅三倍，即係話㩒錢方便過買汽水。銀公主席馮婉眉（圖右二）話，選擇荃灣做展覽第一站，係因為自己同荃灣有深厚淵源，第一份暑期工同埋銀行見習經理都係喺荃灣返工。金管局副總裁余偉文（圖右一）就話，用過懷舊錢罌，仲有辦法唔打爛個錢罌都攞到入面啲錢出來，歡迎同大家切磋切磋吓！