咪以為對冲基金大鱷只識搵錢，「沽神」約翰保爾森亦識捐錢。保爾森同佢家族基金宣佈捐1億美金畀紐約中央公園做復修工程，創下最大筆公園捐款紀錄，遲吓可能要叫保爾森做「捐神」先得。
1億美金搞復修
保爾森旗下對冲基金，管理資產總值210億美金，要佢捐1億美金出來可謂濕濕碎。佢對中央公園亦好有感情，佢話自己細個嗰陣，父母不時用BB車帶佢行過中央公園，家佢喺第五大道個apartment面向中央公園東面，日對夜對。照咁講，畀錢搞復修對佢亦有好處。查實保爾森經常做善事，每次出手都好闊綽。09年佢向紐約大學商學院捐2000萬美金，前年同太太Jenny一齊向紐約南漢普頓醫院捐出500萬美金，之後醫院將急症室以「保爾森」命名，同年佢亦向厄瓜多爾一間兒童醫院捐1500萬美金，都唔及今次大手筆。