信德集團（242）噚日公佈，用開嘅核數師屈洪疇會計師事務所辭任，已經請番間四大之一嘅羅兵咸永道做核數師，即日生效。齋睇呢則通告似碎料，但查實屈洪疇係替已故全國政協副主席霍英東、賭王何鴻燊同埋新世界發展（017）創辦人鄭裕彤嘅公司核數，有呢幾位大客，就知佢唔簡單。
摺埋會計師行
屈洪疇約80歲，向來低調，佢間會計師事務所得好少partner，一直幫信德、新世界同澳博（880）做核數。上月澳博話，屈洪疇要退休而辭任，交畀聯席核數師德勤做，家辭埋信德份工，似乎理所當然，只差新世界未有類似通告，新世界目前由屈洪疇同羅兵咸永道做聯席核數。聽講，屈洪疇年事已高，打算執咗間會計師行。咁都啱，屈老先生咁多年來幫呢幾位大孖沙嘅公司核數，應該知道唔少嘢，如今逍遙自在退休去仲好啦。