港澳辦前副主任陳佐洱噚日接受人民網強國論壇訪問時話，若果唔係蔣介石，香港都唔會割讓咗畀英國。八方都知呢十五年嚟，香港人心未回歸激到阿爺好鬼㷫，但翻舊賬都有個譜，明明係清朝政府將香港割畀英國，點解陳佐洱要賴蔣介石？原來陳佐洱話，本來日軍喺二戰投降後，香港嘅日軍要向中國戰區最高統帥蔣介石投降，點知英國喺香港自組臨時行政組織，仲派艦隊落香港；雖然蔣介石要求英國唔好亂嚟，又叫埋美國幫拖，但美國決定幫英國，蔣介石又冇企硬收番香港，卒之畀英國代表夏愨接收香港，搞成今日嘅局面。不過，八方覺得好彩當年蔣介石冇拎番香港，否則之後中共建政，香港就同大陸一樣，難逃反右、文革等災難，香港人冇好日子過之外，中國改革開放都未必會出現。