《人物專訪》
假如成為iBanker是閣下的理想，那麼以下三位主角，顯然視你的理想為無物。三個80後，同樣有iBanker高薪筍工唔做，膽粗粗創業。其中一個為麥格理經理級人馬，轉行搞外賣飯盒；另兩名年輕人，不甘於瑞信、摩通打份牛工，決定齊做老闆搞另類補習。 記者：倪敏慧
陳嘉銓（Danny）表示：「起初個個都大潑冷水，好哋哋有iBank唔做，我外父、外母都曾經好唔開心。」其實陳嘉銓所指的外父，原來就是立法會議員何俊仁。
陳嘉銓2007年加入麥格理衍生工具的支援部門，剛好見證金融市場，由高峯跌至谷底，最後他成功避過裁員潮。本來可繼續安心做個「賓架」（Banker）的他，前年便決定主動離場，與老婆May，亦即何俊仁女兒，於金鐘開設「便當工房」，主要賣日台式外賣平價便當，主攻金融界人士。
一樣於金融區工作，不一樣的工作性質。以往安坐辦公室，每日對着一堆數字，工作性質刻板，對他來說，毫無工作壓力，輕輕鬆鬆賺巨額bonus。
偏偏他竟萌起唔撈念頭，「我覺得唔適合，銀行廣告成日話為客着想，其實間間係為賺錢。以前加拿大滙豐sell客，都會憑良心去做，但香港係另一個世界，一個廝殺嘅世界，你唔殺佢（客），第二個會殺，完全冇道德。」
曾做大家樂水吧偷師
他回想當年金融海嘯，眼見花旗銀行股價由60美元直插至2美元，但不少散戶卻因為Accumulator（股票累計期權合約，外界戲謔為"I kill you later"），「焗住」要以每股30多美元買入，他為這班散戶感不值，但無奈愛莫能助。
他不想為錢而顛倒自己的價值觀，同時希望完成創業理想，於是決定豁出去博一博。有見餐飲業入行門檻低，加上多得港交所（388）加時，令金融界對外賣的需求增加，於是他用一年時間，籌備「便當工房」。
Danny為求偷師，主動應徵到大家樂（341）申請做水吧，由低學起兼偷師，了解如何控制出餐的速度，以便學以致用，將系統應用於自己店舖。
做生意諗計由輸變贏
以往對着投行高層，轉個身與學歷較低之基層共事，Danny彷彿置身另一個世界，「以前做投行，每講一句說話都要諗後果，隨時因為一句嘢，俾人攞住嚟砌，唔可以暢所欲言；但大家樂啲人好直，唔鍾意就鬧你，你唔搞佢，佢就唔搞你，仲會教你。」
現時Danny與老婆日日落舖，親力親為。近日面對同區競爭加劇，營運開始出現危機。問他與Banker比較，那份工作滿足感較大。
Danny笑言，「人工當然係做投行較大滿足，家我成日諗住盤生意，生活都冇埋。不過做生意畀到我以前未有過嘅體驗，我認我家生意算係輸咗，但生意最開心地方，就係你要諗方法由輸變贏。對我來講，iBanker只係一份人工多啲嘅工，That's it。」