【本報訊】數碼通（315）總裁黎大鈞被指因唔夠頻譜而要重整2G頻譜去搞4G，他回應指只是「更有效運用現有資源」，而其「改裝」的4G頻譜亦被蘋果公司點名認可，目前逾90%的新增用戶都是4G客，主要原來是iPhone5銷情好理想！
黎大鈞：iPhone5好好賣
因商業協議關係，向來敢言的黎大鈞亦只能透露iPhone 5銷情「好理想」，但他承認iPhone 5對整個4G市場起了帶動作用，「今季係（4G市場）轉捩點，因為好多4G機推出……」並承認自9月11日推出4G以來，數碼通超過90%的新客都是4G客。
早前有券商指，本港流動電訊商未有因為推4G而提高收費，呼籲投資者換馬至「有加價空間」的固網營運商，黎大鈞承認要保持競爭力而未有上調4G收費，但會透過獨特的增值服務去提高收入，「你睇我哋ARPU（每月每戶平均收入）高過其他人……其實係睇吓你諗唔諗到好嘅嘢。」
上月蘋果iPhone 5發佈會上，數碼通成為唯一獲蘋果公司點名的香港合作夥伴，原因是集團用來提供4G服務的1800MHz頻譜通過蘋果的認證，諷刺的是，數碼通這條1800頻譜本來是提供2G服務，但集團未有投得4G頻譜，迫使改裝1800MHz頻譜，「當時決定用1800（做4G）係要冒險㗎，又要重組頻譜，又要擔心市場有無手機供應……」結果給他「博中」了，除了iPhone 5支援1800頻譜，越來越多新推的4G亦支援1800頻譜。
網絡慢解畫 要睇順同爽
數碼通向以網絡質素見稱，近年卻飽受網絡速度轉慢的批評，「好多因素要考慮，要睇你用邊部手機？上邊個網？」黎大鈞舉出大堆辯護理由。早前有券商指數碼通的4G網絡唔夠快，黎大鈞承認，若網絡太多人用，「（客戶）可能要等一等」，但他強調「快慢無意思……順同爽先係我哋嘅focus。」早前數碼通亦有出價競投2600MHz頻譜，最終因出價低而零收穫，黎大鈞表示，會出「合理」價競投明年推出的頻譜。」